വാടക വീട്ടില് കൊല്ലപ്പെട്ടത് നേപ്പാളുകാരി; ഒപ്പം താമസിച്ചത് ഭര്ത്താവല്ലെന്ന് പോലീസ്
കൊച്ചി: എളംകുളത്ത് വാടക വീട്ടില് കൊല്ലപ്പെട്ട നിലയില് കണ്ടെത്തിയ യുവതിയെ തിരിച്ചറിഞ്ഞു. നേപ്പാളുകാരി ഭഗീരഥി ധാമിയാണ് കൊല്ലപ്പെട്ടത്. ഒക്ടോബര് 17നാണ് യുവതിയുടെ മൃതദേഹം കണ്ടെത്തുന്നത്. ലക്ഷ്മി എന്ന പേരിലാണ് എളംകുളത്ത് താമസിച്ചത്. ഒപ്പം താമസിച്ചിരുന്ന റാം ബഹദൂറിനെ കണ്ടെത്തുന്നതിനായി പൊലീസ് അന്വേഷണം വ്യാപിപ്പിച്ചു. മഹാരാഷ്ട്രയിലെ മേല്വിലാസം ആണ് ഇവര് വാടകയ്ക്ക് വീടെടുത്തപ്പോള് നല്കിയത്. എന്നാല് ഇരുവരും നേപ്പാള് സ്വദേശികളാണെന്ന് പൊലീസ് വ്യക്തമാക്കിയിരുന്നു. റാം ബഹദൂര് എന്നയാള് ഇവരുടെ ഭര്ത്താവല്ലെന്നും പൊലീസ് പറയുന്നു. റാം ബഹദൂറിന്റെ ഫോണ് സ്വിച്ച്ഡ് ഓഫ് ആണ്. പത്ത് വര്ഷത്തിലേറെയായി റാം ബഹാദൂര് കൊച്ചിയിലുണ്ട്. ജോലിക്കെന്ന പേരിലാണ് നാല് വര്ഷങ്ങള്ക്ക് മുന്പ് ഭഗീരഥി കൊച്ചിയില് എത്തിയത്.
