കേരളത്തില് അഞ്ചുദിവസം വ്യാപകമായ മഴയ്ക്ക് സാധ്യത
ബംഗാള് ഉള്ക്കടലില് ന്യൂനമര്ദം രൂപപ്പെട്ടത്തിനെ തുടർന്ന് അടുത്ത അഞ്ച് ദിവസം കേരളത്തില് വ്യാപകമായി ഇടി മിന്നലോടുകൂടിയ മഴയ്ക്ക് സാധ്യത.
തിരുവനന്തപുരം: വടക്കന് ഒഡീഷ-പശ്ചിമ ബംഗാള് തീരത്തിന് സമീപമാണ് ന്യൂനമര്ദം രൂപപ്പെട്ടതെന്ന് കേന്ദ്ര കാലാവസ്ഥാ വകുപ്പ് അറിയിച്ചു. അടുത്ത അഞ്ച് ദിവസം കേരളത്തില് വ്യാപകമായി ഇടി മിന്നലോടുകൂടിയ മഴയ്ക്കും ജൂണ് 27വരെ ഒറ്റപ്പെട്ട സ്ഥലങ്ങളില് ശക്തമായ മഴയ്ക്കും സാധ്യതയുണ്ടെന്ന് കാലാവസ്ഥാ വകുപ്പ് മുന്നറിയിപ്പ് നല്കി.
ആലപ്പുഴ, എറണാകുളം, തൃശ്ശൂര്, കോഴിക്കോട് എന്നീ നാല് ജില്ലകളില് ഞായറാഴ്ച യെല്ലോ അലര്ട്ട് പ്രഖ്യാപിച്ചു. തിങ്കളാഴ്ച കണ്ണൂര്, എറണാകുളം ജില്ലയിലും ചൊവ്വാഴ്ച ആലപ്പുഴ, കോട്ടയം, എറണാകുളം, ഇടുക്കി, തൃശ്ശൂര്, പാലക്കാട്, മലപ്പുറം എന്നീ ഏഴ് ജില്ലകളിലും യെല്ലോ അലര്ട്ട് പ്രഖ്യാപിച്ചിട്ടുണ്ട്. ഒറ്റപ്പെട്ട ശക്തമായ മഴയ്ക്കുള്ള സാധ്യതയാണ് ഈ ജില്ലകളില് പ്രവചിക്കപ്പെട്ടിരിക്കുന്നത്.
