പുഷ്പ 2 റിലീസിനിടെ തിക്കിലും തിരക്കിലുംപെട്ട് യുവതി മരിച്ച സംഭവം; നടന് അല്ലു അര്ജുന് അറസ്റ്റില്
പുഷ്പ 2 റിലീസിനിടെ തിക്കിലും തിരക്കിലുംപെട്ട് യുവതി മരിച്ച സംഭവത്തില് നടന് അല്ലു അര്ജുന് അറസ്റ്റില്. ഹൈദരാബാദ് പൊലീസാണ് അറസ്റ്റ് ചെയ്തത്. ജൂബിലിഹില്സിലെ വീട്ടിലെത്തിയാണ് കസ്റ്റഡിയിലെടുത്ത് അറസ്റ്റ് രേഖപ്പെടുത്തിയത്. ചിക്കട്പള്ളി സ്റ്റേഷനിലേക്ക് അല്ലുവിനെ കൊണ്ടുവരുന്നു. ഡിസംബർ 4 ബുധനാഴ്ച രാത്രി 11 മണിയ്ക്കായിരുന്നു ഹൈദരാബാദിലെ സന്ധ്യാ തിയറ്ററിൽ അപകടമുണ്ടായത്. സംഭവത്തിൽ അല്ലു അർജുനെതിരെ പോലീസ് കേസെടുത്തിരുന്നു. ഇന്നലെ തനിക്കെതിരെ രജിസ്റ്റർ ചെയ്ത കേസ് റദ്ദാക്കണമെന്ന് ആവശ്യപ്പെട്ട് അല്ലു അർജുൻ തെലങ്കാന ഹൈക്കോടതിയെ സമീപിച്ചിരുന്നു. ഇതിനു പിന്നാലെയാണ് ഇന്ന് അറസ്റ്റ് ചെയ്തത്.
അല്ലു അര്ജുനെതിരെ മനപ്പൂര്വ്വമല്ലാത്ത നരഹത്യ. മനപൂര്വ്വം ദ്രോഹിക്കാന് ശ്രമിച്ചു എന്നീ വകുപ്പുകള് പ്രകാരമാണ് കേസ് എടുത്തിരിക്കുന്നത്. ഒപ്പം സന്ധ്യ തിയറ്റര് മാനേജ്മെന്റ്, അല്ലുവിന്റെ പ്രൈവറ്റ് സെക്യൂരിറ്റി ചുമതല ഉള്ള ആള്, ആ സമയത്ത് അല്ലുവിന് ഒപ്പമുണ്ടായിരുന്ന സിനിമാ സംഘാംഗങ്ങള് എന്നിവര്ക്കെതിരെയും കേസ് എടുത്തിട്ടുണ്ട്. അതേസമയം അല്ലു അര്ജുന് ഈ കേസില് തെലങ്കാന ഹൈക്കോടതിയെ സമീപിച്ചിട്ടുണ്ട്. എന്നാല് കോടതി കേസ് ഫയലില് സ്വീകരിച്ചിട്ടേയുള്ളൂ. നടന് മുന്കൂര് ജാമ്യത്തിന് കോടതിയെ സമീപിക്കുന്നതിന് മുന്പാണ് പൊലീസിന്റെ നടപടി.
ഭര്ത്താവ് മൊഗഡാന്പള്ളി ഭാസ്കറിനും മകന് ശ്രീ തേജിനും ഒപ്പം ഇളയമകള് സാന്വിക്കും ഒപ്പമാണ് രേവതി ബുധനാഴ്ച രാത്രി പ്രീമിയര് നടന്ന തിയറ്ററില് എത്തിയത്. എന്നാല് മകള് സാന്വി കരഞ്ഞതിനാല് കുട്ടിയെ തിയറ്ററിന് അടുത്തുള്ള ബന്ധുവീട്ടില് ആക്കുവാന് ഭാസ്കര് പോയി. ഈ സമയത്താണ് പ്രീമിയര് കാണാനായി അല്ലു അര്ജുന് തിയറ്ററിലേക്ക് എത്തിയത്. തടിച്ചുകൂടിയിരുന്ന ആരാധകരുടെ ആവേശം ഇതോടെ അതിരുവിടുകയും ദുരന്തം സംഭവിക്കുകയുമായിരുന്നു. ശ്രീ തേജിനെ തിരക്കില് നിന്നും രക്ഷിക്കാനുള്ള ശ്രമത്തിനിടെയാണ് രേവതി നിലത്ത് വീണത്. ശ്രീ തേജിന് ഗുരുതരമായ പരിക്കാണ് പറ്റിയത്.
അതേസമയം സംഭവത്തില് അനുശോചിച്ചും രേവതിയുടെ കുടുംബത്തിന് 25 ലക്ഷം ധനസഹായം പ്രഖ്യാപിച്ചും അല്ലു അര്ജുന് രംഗത്തെത്തിയിരുന്നു. ഇത്തരമൊരു സംഭവം നടന്നതിൽ ഹൃദയം തകർന്നു. വൈകാതെ ആ കുടുംബാംഗങ്ങളെ നേരിട്ട് കാണാൻ എത്തും. ഇപ്പോൾ അവരുടെ സ്ഥിതി കണക്കിലെടുത്ത് എല്ലാ പിന്തുണയും ഉറപ്പ് നൽകുന്നു. രേവതിയുടെ ഗുരുതരമായി പരിക്കേറ്റ മകന് ശ്രീ തേജിന്റെ എല്ലാ ചികിത്സാ ചെലവുകളും ഏറ്റെടുക്കാൻ തയ്യാറാണ്. കുടുംബത്തിന് 25 ലക്ഷം ധനസഹായം നൽകും, അല്ലു അര്ജുന് അറിയിച്ചിരുന്നു.
