വീട്ടില് അതിക്രമിച്ച് കയറി നടിയെ ഉപദ്രവിച്ചു; കന്നഡ ടെലിവിഷന് നടന് ചരിത് ബാലപ്പയെ അറസ്റ്റ് ചെയ്തു
ബംഗളൂരു : കന്നഡ ടെലിവിഷന് നടന് ചരിത് ബാലപ്പയെ അറസ്റ്റ് ചെയ്തു. ലൈംഗികാതിക്രമം, ആക്രമണം, കൊള്ളയടിക്കല്, ക്രിമിനല് ഭീഷണിപ്പെടുത്തല് എന്നീ കുറ്റങ്ങള്ക്കാണ് അറസ്റ്റ് ചെയ്തത്. 29 കാരിയായ നടി നല്കിയ പരാതിയെ തുടര്ന്നാണ് അറസ്റ്റ്, വെള്ളിയാഴ്ച പോലീസ് സ്ഥിരീകരിച്ചു. 2023 നവംബര് 1 മുതല് 2024 ഡിസംബര് 13 വരെയുള്ള കാലയളവിലാണ് ആരോപണവിധേയമായ സംഭവങ്ങള് നടന്നതെന്ന് പോലീസ് പറയുന്നു. തെലുങ്ക്, കന്നഡ സീരിയലുകളില് പ്രവര്ത്തിക്കുന്ന നടി, ബാലപ്പയെ ആദ്യമായി കാണുന്നത് 2017 ലാണ് കണ്ടതെന്ന് പരാതിയില് പറയുന്നു.
നടി തനിച്ചാണ് താമസിക്കുന്നതെന്ന് അറിഞ്ഞ ബാലപ്പ ഒരിക്കല് തന്റെ കൂട്ടാളികളോടൊപ്പം വീട്ടില് അതിക്രമിച്ച് കയറി ഉപദ്രവിക്കുകയും ബഹളമുണ്ടാക്കുകയും ചെയ്തുവെന്ന് എഫ്ഐആറില് പറയുന്നു. ബാലപ്പ തന്നോട് പണം ആവശ്യപ്പെടുകയും അവരുടെ സ്വകാര്യ ചിത്രങ്ങള് സോഷ്യല് മീഡിയയിലും മറ്റ് അഭിനേതാക്കള് ഉള്പ്പെടുന്ന ഒരു വാട്ട്സ്ആപ്പ് ഗ്രൂപ്പിലും പങ്കിടുമെന്ന് ഭീഷണിപ്പെടുത്തുകയും ചെയ്തതായും നടി അവകാശപ്പെട്ടു. തനിക്കെതിരെ കള്ളക്കേസെടുക്കുമെന്ന് ബാലപ്പ ഭീഷണിപ്പെടുത്തിയെന്നും ജയിലില് അടയ്ക്കുമെന്ന് സൂചന നല്കിയെന്നും പരാതിയില് പറയുന്നു.
