കണ്ണൂർ മെഡിക്കൽ കോളേജ് ശുചിമുറിയിൽ മൂർഖൻ; രോഗികളിൽ വലിയ ഭീതി പരത്തി

കണ്ണൂർ : പരിയാരത്തുള്ള കണ്ണൂർ ഗവൺമെന്റ് മെഡിക്കൽ കോളേജിലെ കാർഡിയോളജി വിഭാഗത്തിലെ ശുചിമുറിയിൽ മൂർഖൻ പാമ്പിനെ കണ്ടെത്തിയത് രോഗികളിൽ വലിയ ഭീതി പരത്തി. വ്യാഴാഴ്ച രാവിലെയാണ് ബി ബ്ലോക്കിലെ ഒരു രോഗിയുടെ കൂട്ടിരിപ്പുകാരൻ ശുചിമുറിയിലേക്ക് പോയപ്പോൾ പാമ്പിനെ കണ്ടത്. ഉടൻതന്നെ സുരക്ഷാ ജീവനക്കാരെത്തി പാമ്പിനെ പിടികൂടി നീക്കം ചെയ്തു. മെഡിക്കൽ കോളേജിൽ വർഷങ്ങളായി തുടരുന്ന വിഷപ്പാമ്പ് ശല്യം ഇപ്പോഴും ഒരു മാറ്റവുമില്ലാതെ തുടരുന്നത് ആശങ്ക സൃഷ്ടിക്കുന്നുണ്ട്. വിദ്യാർത്ഥികളുടെ ഹോസ്റ്റലുകളിലും മറ്റും നേരത്തെയും പാമ്പ് ശല്യം രൂക്ഷമായിരുന്നു. പ്രദേശത്തെ കാടുകൾ വെട്ടിത്തെളിക്കാ ത്തതും മാലിന്യം അലക്ഷ്യമായി നിക്ഷേപിക്കുന്നതുമാണ് പാമ്പ് ശല്യം വർദ്ധിക്കാൻ കാരണമെന്ന് പ്രദേശവാസികൾ പരാതിപ്പെടുന്നു.