ഒമാൻ ഒഴികെയുള്ള ഗൾഫ് രാജ്യങ്ങളിൽ ഇന്ന് ചെറിയ പെരുന്നാൾ

റിയാദ് : ഒമാൻ ഒഴികെയുള്ള ഗൾഫ് രാജ്യങ്ങളിൽ മാർച്ച് 30 ഞായറാഴ്ച ചെറിയ പെരുന്നാൾ. ഞായറാഴ്ച ഈദ് അൽ ഫിത്തറിന്റെ ആദ്യ ദിവസമായിരിക്കുമെന്ന് സൗദി അറേബ്യയും യുഎഇയും ഖത്തറും കുവൈറ്റും പ്രഖ്യാപിച്ചു. മാസപ്പിറവി കണ്ടതോടെയാണ് പ്രഖ്യാപനം. അതേസമയം മാസപ്പിറവി ദൃശ്യമാകാത്തിനാൽ ഒമാനിൽ തിങ്കളാഴ്ചയാകും ചെറിയ പെരുന്നാൾ എന്ന് ഭരണകൂടം പ്രഖ്യാപിച്ചു. ഞായറാഴ്ച നഗ്നനേത്രങ്ങൾക്ക് ചന്ദ്രക്കല ദൃശ്യമാകുമെന്നാണ് പ്രവചനം. ഒമാൻ 30 നോമ്പും പൂ‍ർത്തിയാക്കിയാണ് ചെറിയ പെരുന്നാൾ ആഘോഷിക്കുക. സൗദിയിലെ 15,948 ലധികം പള്ളികളിലും 3,939 തുറസ്സായ പ്രാർഥനാ മൈതാനങ്ങളിലും ഞായറാഴ്ച പുലർച്ചെ ഈദ് പ്രാർഥനകൾ നടക്കും. യുഎഇയിലെ ചന്ദ്രക്കല സമിതി മഗ്രിബ് പ്രാർഥനകൾക്ക് ശേഷം ചേ‍ർന്ന യോഗത്തിലാണ് ശവ്വാൽ മാസപ്പിറവി പ്രഖ്യാപിച്ചത്. തുട‍ർന്ന് നീതിന്യായ മന്ത്രിയും സമിതി ചെയർമാനുമായ അബ്ദുല്ല ബിൻ സുൽത്താൻ ബിൻ അവാദ് അൽ നുഐമി ഇക്കാര്യം സ്ഥിരീകരിച്ചു.

മന്ത്രി അബ്ദുല്ല ബിൻ സുൽത്താൻ ബിൻ അവാദ് അൽ നുഐമിയും ചന്ദ്രക്കല സമിതി അംഗങ്ങളും പ്രസിഡന്റ് ഹിസ് ഹൈനസ് ഷെയ്ഖ് മുഹമ്മദ് ബിൻ സായിദ് അൽ നഹ്യാൻ, വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ഹിസ് ഹൈനസ് ഷെയ്ഖ് മുഹമ്മദ് ബിൻ റാഷിദ് അൽ മക്തൂം, വൈസ് പ്രസിഡന്റും ഉപപ്രധാനമന്ത്രിയും പ്രസിഡൻഷ്യൽ കോടതി ചെയർമാനുമായ ഷെയ്ഖ് മൻസൂർ ബിൻ സായിദ് അൽ നഹ്യാൻ, സുപ്രീം കൗൺസിൽ അംഗങ്ങൾ, എമിറേറ്റ്സ് ഭരണാധികാരികൾ, കിരീടാവകാശികൾ എന്നിവർക്ക് ഊഷ്മളമായ അഭിനന്ദനങ്ങൾ അറിയിച്ചു. യുഎഇ ഭരണകൂടം ജനതയ്ക്കും ലോകമെമ്പാടുമുള്ള മുസ്ലീങ്ങൾക്കും ഈദ് അൽ ഫിത്തർ ആശംസിച്ചു