തിയറ്ററുകളിൽ പ്രദർശനം തുടരുന്ന ‘പണി’ സിനിമക്കെതിരെ നൽകിയ ഹരജി പിൻവലിച്ചു

കൊച്ചി : തിയറ്ററുകളിൽ പ്രദർശനം തുടരുന്ന ‘പണി’ സിനിമക്കെതിരെ നൽകിയ ഹരജി പിൻവലിച്ചു. യു/എ സർട്ടിഫിക്കറ്റ് നൽകിയ സിനിമക്ക്​ നിരക്കാത്ത സംഭാഷണങ്ങളും ദൃശ്യങ്ങളും ‘പണി’യിൽ ഉണ്ടെന്നും ഇത് കുട്ടികളുടെ മനസ്സിനെ ദോഷകരമായി സ്വാധീനിക്കുമെന്നും ആരോപിച്ച്​ പനങ്ങാട് സ്വദേശി ബിനു പി. ജോസഫ് നൽകിയ പൊതുതാൽപര്യ ഹരജിയാണ്​ പിൻവലിച്ചത്. സിനിമക്ക്​ ‘എ’ സർട്ടിഫിക്കറ്റ് നൽകാൻ കേന്ദ്ര സെൻസർ ബോർഡിന് നിർദേശം നൽകണമെന്നായിരുന്നു ഹരജിയിലെ ആവശ്യം. ഹരജി തള്ളുമെന്ന് ചീഫ് ജസ്റ്റിസ് അടങ്ങുന്ന ഡിവിഷൻ ബെഞ്ച്​ വാക്കാൽ വ്യക്തമാക്കിയതോടെ പിൻവലിക്കാൻ ഹരജിക്കാരന്‍റെ അഭിഭാഷകൻ അനുമതി തേടുകയായിരുന്നു. തുടർന്ന്​ ഈ ആവശ്യം അനുവദിച്ചു.