സിവി ധനരാജ് കേസിൽ നവംബർ 23ന് വിധി പറയും
കണ്ണൂർ: പയ്യന്നൂരിലെ സിപിഎം പ്രവർത്തകനായിരുന്ന സിവി ധനരാജിനെ കൊലപ്പെടുത്തിയ കേസിൽ നവംബർ 23ന് തളിപ്പറമ്പ് അഡീഷണൽ ജില്ലാ കോടതി വിധി പറയും. അന്തിമ വാദം പൂർത്തിയായതോടെയാണ് കേസ് വിധി പറയാനായി മാറ്റിയത്. ഇരുപത്തിയൊന്ന് ആർഎസ്എസ്, ബിജെപി പ്രവർത്തകരാണ് കേസിലെ പ്രതികൾ .കണ്ണൂർ രാഷ്ട്രീയത്തിൽ ഏറെ കോളിളക്കം സൃഷ്ടിച്ച കൊലപാതകമായിരുന്നു ധനരാജിന്റേത്. 2016 ജൂലൈ പതിനൊന്നിനാണ് സിപിഎം ഏഴിമല ബ്രാഞ്ച് സെക്രട്ടറിയായിരുന്ന സിവി ധനരാജിനെ ഒരു സംഘം വീട്ടിൽ വെച്ച് വെട്ടി കൊലപ്പെടുത്തിയത്. ബൈക്കിൽ വീട്ടിലേക്ക് വരികയായിരുന്ന ധനരാജിനെ മൂന്നു ബൈക്കുകളിലായി പിന്തുടർന്നെത്തിയ സംഘമാണ് അക്രമിച്ചത്. കേസ് അന്വേഷിച്ച പ്രത്യേക അന്വേഷണ സംഘം ആർഎസ്എസ്-ബിജെപി പ്രവർത്തകരാണ് കൊലപാതകത്തിന് പിന്നിലെന്ന് കണ്ടെത്തി.
21 പ്രതികളാണ് കേസിലുണ്ടായിരുന്നത്. ഇതിൽ പന്ത്രണ്ടാം പ്രതിയായ ചൂരക്കാട് ബിജു ഒരു വർഷത്തിന് ശേഷം കൊല്ലപ്പെട്ടു.തളിപ്പറമ്പ് അഡീഷണൽ ജില്ലാ കോടതിയിലായിരുന്നു ധനരാജ് വധക്കേസിന്റെ വിചാരണ നടപടികൾ. മുഴുവൻ പ്രതികളേയും കോടതി നേരിട്ട് ചോദ്യം ചെയ്തു. അന്തിമ വാദം കൂടി പൂർത്തിയായതോടെയാണ് കേസ് വിധി പറയാനായി മാറ്റിയത്. ധനരാജ് കൊല്ലപ്പെട്ട അന്ന് രാത്രി തന്നെ ബിജെപി പ്രവർത്തകനായിരുന്ന സികെ രാമചന്ദ്രനെ ഒരു സംഘം വെട്ടിക്കൊലപ്പെടുത്തി. ധനരാജ് രക്ത സാക്ഷി ഫണ്ട് തിരിമറിയാരോപണം സിപിഎമ്മിനെ പ്രതിക്കൂട്ടിലാക്കിയിരുന്നു