സ്വർണ വില വീണ്ടും റെക്കോർഡ് തകർത്തു; പവന് 1 ലക്ഷത്തിന് അടുത്ത്, ആദ്യമായി 99,000 രൂപ കടന്നു
കേരളത്തിൽ സ്വർണ വില വീണ്ടും റെക്കോർഡ് തകർത്തു. ഇന്ന് രാവിലെ വില കുതിച്ചതിനു ശേഷം ഇന്ന് ഉച്ചക്കു ശേഷം പിന്നെയും വില കുതിച്ചു. ഇതോടെ കേരള ചരിത്രത്തിൽ ആദ്യമായി പവന് 99,000 രൂപ കടന്നു. 1 ലക്ഷത്തിലേക്ക് ഇനി കുറച്ച് ദൂരം മാത്രം. ഇപ്പോൾ ഗ്രാമിന് 60 രൂപയും പവന് 480 രൂപയുമാണ് വർദ്ധിച്ചത്. അതായത് ഇന്ന് ആകെ ഗ്രാമിന് 135 രൂപയും പവന് 1,080 രൂപയും വർദ്ധിച്ചിട്ടുണ്ട്. ഇതോടെ ആഭരണപ്രേമികളുടെ നെഞ്ചിടിപ്പ് വർദ്ധിക്കുന്നു.
സ്വർണ വിലയിലെ ഈ വമ്പൻ കുതിച്ചു കയറ്റം താങ്ങാനാവുന്നതല്ല. സ്വർണ വില ഉയരുന്നതിനേക്കാൾ കൂടുതൽ അത് ആഭരണ രൂപത്തിൽ വാങ്ങുമ്പോൾ ചിലവഴിക്കേണ്ടി വരും. അതിനു കാരണം ജിഎസ്ടി, പണിക്കൂലി, ഹാൾമാർക്ക് ചാർജ് എന്നിവ ഈടാക്കുന്നതിനാലാണ്. ഉച്ചയോടെ വില ഉയർന്നതിനാൽ നിലവിൽ ഒരു പവൻ സ്വർണത്തിന് വില 99,280 രൂപയാണ്. ഇനി വെറും 720 രൂപയുടെ വ്യത്യാസം മാത്രമാണ് 1 ലക്ഷം രൂപയിലേക്കുള്ളത്. യുഎസ് കേന്ദ്ര ബാങ്കായ ഫെഡറൽ റിസർവിൻ്റെ പണനയ പ്രഖ്യാപനമാണ് സ്വർണത്തിന് കരുത്തേകുന്നത്.
ഉച്ചക്കു ശേഷം സ്വർണ വിലയിൽ വമ്പൻ കുതിപ്പാണ് രേഖപ്പെടുത്തിയത്. ഇതോടെ ഇന്നത്തെ സ്വർണ വിലയിൽ വലിയ മാറ്റമുണ്ടായി. ഇന്ന് മൊത്തത്തിൽ ഒരു ഗ്രാമിന് 135 രൂപ ഉയർന്ന് 12,410 രൂപയായി. ഒരു പവന് 1,080 രൂപ ഉയർന്ന് 99,280 രൂപയായി. ഇന്നത്തെ വിലപ്രകാരം 10 ഗ്രാം സ്വർണം വാങ്ങാൻ 1,24,100 രൂപയാവുന്നു. 24 കാരറ്റ് സ്വർണം ഒരു ഗ്രാമിന് 147 രൂപ ഉയർന്ന് 13,538 രൂപയും, പവന് 1,176 രൂപ ഉയർന്ന് 1,08,304 രൂപയുമാവുന്നു. 18 കാരറ്റിന് ഒരു ഗ്രാമിന് 111 രൂപ ഉയർന്ന് 10,154 രൂപയും, പവന് 888 രൂപ ഉയർന്ന് 81,232 രൂപയുമായി.
