എ.കെ ബാലന് നടത്തുന്ന ശ്രമങ്ങള് തന്റെ ചെലവില് വേണ്ടെന്ന് കെപിസിസി പ്രസിഡന്റ് കെ. സുധാകരന് എംപി
കണ്ണൂർ : രാഷ്ട്രീയ നേതാക്കൾ തമ്മിൽ ഇപ്പോൾ നേരിട്ടല്ല അടി. പ്രസംഗങ്ങളിലൂടെ യുമല്ല. പകരം ഫേസ്ബുക്ക് വഴിയാണ് അടിയോടടി. പിണറായി വിജയന്റെ പ്രീതി പിടിച്ചുപറ്റി ഏതെങ്കിലും സ്ഥാനം കിട്ടാന് മുന്മന്ത്രി എ.കെ ബാലന് നടത്തുന്ന ശ്രമങ്ങള് തന്റെ ചെലവില് വേണ്ടെന്ന് കെപിസിസി പ്രസിഡന്റ് കെ. സുധാകരന് എംപി. വായിലൂടെ വിസര്ജ്ജിക്കുന്ന ജീവിയായി എ.കെ ബാലന് മാറിയത് ദയനീയമായ കാഴ്ചയാണെന്നും കെ.സുധാകരന് എംപി ഫെയ്സ്ബുക്കില് കുറിച്ചു. സുധാകരനെ പാന്റ് ഊരി ബ്രണ്ണൻ കോളേജ് ക്യാംപസിലൂടെ നടത്തിയിട്ടുണ്ടെന്നും കോണ്ഗ്രസിലെ ചില നേതാക്കള് അതിന് സാക്ഷിയാണെന്നും കഴിഞ്ഞദിവസം എ.കെ ബാലന് ഫെയ്സ്ബുക്കില് കുറിച്ചിരുന്നു. ഇതില് പ്രതികരിക്കുകയാണ് കെ. സുധാകരന് എംപി.
ഫെയ്സ്ബുക്ക് കുറിപ്പിന്റെ പൂര്ണരൂപം: വായിലൂടെ വിസര്ജ്ജിക്കുന്ന ജീവിയായി മുന്മന്ത്രി എ കെ ബാലന് മാറിയത് ദയനീയമായ കാഴ്ചയാണ്. സിപിഎമ്മിന്റെ നേതൃസ്ഥാനത്തുനിന്ന് ഒഴിവാക്കപ്പെട്ടതിന്റെ പേരില് നായ മോങ്ങുന്നത് പോലെ മോങ്ങിയ ബാലന്റെ ചിത്രം രാഷ്ട്രീയ കേരളം കഴിഞ്ഞ ദിവസങ്ങളില് കണ്ടതാണ്. പിണറായി വിജയന്റെ പ്രീതി പിടിച്ചുപറ്റി വീണ്ടും എന്തെങ്കിലും സ്ഥാനം കിട്ടാന് ബാലന് നടത്തുന്ന പെടാപ്പാട് ഒരു പഴയകാല സുഹൃത്ത് എന്ന നിലയില് ഞാന് തിരിച്ചറിയുന്നു. പക്ഷേ ആ സ്ഥാനമോഹം കെ സുധാകരന്റെ ചിലവില് വേണ്ട എന്ന് സ്നേഹപൂര്വ്വം ഓര്മിപ്പിക്കുന്നു. കെ സുധാകരന് ആരാണെന്നും പിണറായി വിജയന് എന്തായിരുന്നു എന്നും ബ്രണ്ണന് കോളേജിലെ ചുവരുകള്ക്കും ‘കോണിപ്പടികള്ക്കും ‘ മാത്രമല്ല രാഷ്ട്രീയം നിരീക്ഷിച്ചിട്ടുള്ള സര്വലോക മലയാളികള്ക്കും അറിയാം. സുധാകരന്റെയോ അന്നത്തെ കെ.എസ്.യു. നേതാക്കളുടെയോ നിഴലില് പോലും നേര്ക്കുനേര് നില്ക്കാനുള്ള ധൈര്യം വിജയനോ ബാലനോ കൂട്ടുകക്ഷികള്ക്കോ ഉണ്ടായിരുന്നില്ല എന്നത് ആ കോളേജിന്റെ ചരിത്രമാണ്. ഈ പ്രായത്തില് പഴയ വീരസ്യങ്ങള് വിളമ്പുന്ന ബാലിശമായ പ്രവൃത്തികളില് താല്പര്യമില്ലാത്തതുകൊണ്ട് ബാലന്റെ തീവ്രത കൂടിയ ജല്പനങ്ങള്ക്ക് പുല്ലുവില കൊടുത്തുകൊണ്ട് അവഗണിക്കുന്നു. എന്തെങ്കിലും പറയാനുണ്ടെങ്കില് പിണറായി വിജയന് പറയട്ടെ, അപ്പോള് കൃത്യമായി മറുപടി പറയാം. യജമാനന് വേണ്ടി വഴിയില്നിന്ന് കുരയ്ക്കുന്ന അടിമ എന്തെങ്കിലും നക്കാപ്പിച്ച കിട്ടുമ്പോള് മാറിക്കിടന്ന് ഉറങ്ങിക്കോളും. കേരളത്തിന്റെ പൊതുസമൂഹത്തിലേക്ക് കൂടുതല് വിസര്ജ്ജ്യങ്ങള് എറിയാതിരുന്നാല് അടിമയ്ക്ക് നല്ലതെന്ന് മാത്രം ഓര്മിപ്പിക്കുന്നു.
