പാലക്കാട് കൊടുവായൂരില് മദ്യപൻ ഓടിച്ച കാറിടിച്ച് രണ്ട് വയോധികർ മരിച്ചു
പാലക്കാട് : പാലക്കാട് കൊടുവായൂരില് മദ്യപൻ ഓടിച്ച കാറിടിച്ച് രണ്ട് വയോധികർ മരിച്ചു. റോഡ് മുറിച്ചു കടക്കാൻ ശ്രമിക്കുന്നതിനിടെയാണ് അപകടം. കാർ ഓടിച്ച എലവഞ്ചേരി സ്വദേശി പ്രേംനാഥ് പി മേനോനെ (45) പൊലീസ് കസ്റ്റഡിയിലെടുത്തു. മരിച്ചവരെ ഇതുവരെ തിരിച്ചറിഞ്ഞിട്ടില്ല. കാർ അമിത വേഗത്തിലായിരുന്നു എന്ന് ദൃക്സാക്ഷികള് പറയുന്നു. അപകടത്തില്പ്പെട്ടത് ഒരു സ്ത്രീയും പുരുഷനുമാണെന്ന് സിസിടിവി ദൃശ്യങ്ങളില് നിന്ന് വ്യക്തമാകുന്നുണ്ട്. ഇന്ന് ഉച്ചയ്ക്ക് രണ്ടരയോടെയാണ് സംഭവം. പുതുനഗരം ഭാഗത്ത് നിന്ന് കൊടുവായൂരിലേക്ക് വരികയായിരുന്ന കാറാണ് വയോധികരെ ഇടിച്ചുതെറിപ്പിച്ചത്. ഇടിയുടെ ആഘാതത്തില് രണ്ട് പേരും ദൂരത്തേക്ക് തെറിച്ചുവീണു. ഇവരെ ഉടൻ പാലക്കാട് ജില്ലാ ആശുപത്രിയില് എത്തിച്ചെങ്കിലും ജീവൻ രക്ഷിക്കാനായില്ല. വാഹനം ഓടിച്ചയാള് മദ്യപിച്ചിരുന്നതായി പൊലീസ് പറയുന്നു. വൈദ്യപരിശോധനയില് ഇക്കാര്യം സ്ഥിരീകരിച്ചിട്ടുണ്ട്. അപകടത്തില് മരിച്ചയാള് തമിഴ്നാട് സ്വദേശികളാണെന്നാണ് സൂചന.
